هذا المقال القصير يحتوي على ألفاظ قد تكون خادشة للحياء بالنسبة للبعض. لا ينصح بقرائته لمن هم دون السن القانونية ولا لمن هم دون المخ القانونية أيضاً، ولا لمن يستحون من ظلهم.
وقد أعذر من لا مؤاخذة أنذر.
زي ما كتبت في التدوينة السابقة، كلنا عارفين إننا شعب متدين بطبعه، وعلشان كدا ما تلاقيش في مجتمعنا بنت بتشتم مطلقاً، لكن الإنترنت بقى بوظ لنا المجتمع وخلّى جزء من البنات تشتم كدا عيني عينك على تويتر، ودا طبعاً غير مقبول على الإطلاق. صحيح فيه ولاد كتير بيشتموا ويسبوا الدين على تويتر وفي الشارع وفي كل حتة، بس دول ولاد! ولأننا شعب متدين بطبعه، فأكيد لازم نربي خلق الله، وخصوصاً البنات والستات، ومن هذا المنطلق اتعملت حملة ضد البنات اللي بتشتم علشان نوقف الظاهرة دي عند حدها.
تدخل يا جدع على التايملاين بتاع البنت من دول تلاقيها حاطة صورة للزعيم الراحل سعد زغلول وهو بيصبع للشعب المصري وبيقول له «خود». ينفع كدا يا بنت الناس؟ الزعيم سعد زغلول كان بيصبع من غير ما يقول «خود» مطلقاً، واللي انتي بتعمليه دا تشويه وتزييف لتاريخ مصر. وبعدين إزاي بنت زيك مؤدبة وبنت ناس تتحمل النظر لمنظر الإيد وهي بتصبع كدا؟ صحيح إنك بتشوفي المنظر دا في الشارع شخرتلاف مرة في اليوم، بس برضه ما ينفعش تحطيه على التايملاين كدا من غير حيا ولا كسوف!
مناظر غريبة وحاجات غريبة الواحد بقى بيشوفها على تويتر وغير تويتر. طب حطيتي صورة الزعيم سعد زغلول وهو بيصبع وقلنا زي بعضه ما هو كان أكيد بيصبع، لكن تحطي علامة رابعة وهي بتصبع؟ ما يصحش الكلام دا أبداً. العلامة دي علامة طاهرة ومقدسة ورمز للكفاح والصمود، تقومي تيجي انتي بكل بساطة كدا وتخليها بتصبع وتنجسي الصورة؟! أيوه عارف إن فيه شباب كتير حاطين الصورة دي برضه، لكن انتي بنت وما يصحش كدا. بنات الناس لازم يبقوا زي الكريستال بيلعلطوا كدهو... شفتي بيلعلطوا إزاي؟ كدهووووو... دلوقت لو حد شاف صورة زي دي على التايملاين بتاعك يقول إيه؟ لو عاوزة تحطي الصورة دي في حتة خليها على الديسكتوب بتاع الكمبيوتر علشان ما يشوفهاش حد تاني. أيوه صحيح أنا لسه قايل إنها بتخدش الحياء وكدا، بس لو انتي الحياء بتاعك جامد وما بيتخدش ما فيش مشكلة لو حطيتيها على الديسكتوب؛ المهم ما حدش يشوفك حاطة صورة زي كدا.
ويا ريت الموضوع وقف عند حد التصبيع. إزاي يا بت انتي تجرؤي تكتبي كلمة «بضان»؟ ه بقت سايبة للدرجة دي؟ مالك انتي ومال البضان؟ انتي عندك بضان؟ لأ طبعاً! وطالما ما عندكيش بضان إزاي تكتبي كلمة زي دي؟ انتي مش عارفة إن الكلمة دي عيب؟ مالكيش دعوة أخوكي بيقولها ولا ما بيقولهاش. أولاً هو ولد وعنده بضان (أو نحسبه كذلك و الله حسيبه) ثانياً انتي بنت... ما ينفعش تقولي أي حاجة الولد يقولها كدا. الله يخرب بيت الإنترنت اللي كل مخكم دا وبسببه بقيتوا تقولوا إحنا زي الولاد والمساواة والكلام الفارغ دا. لأ طبعاً انتي مش زي الولد. البنت عندنا أميرة وملكة متوجة. عمرك شفتي ملكة بتقول «بضان»؟ معلش إحنا عارفين إنك بتتعاكسي في الشارع وبتتبهدلي في المواصلات وكل دا، بس برضه انتي ملكة متوجة. انتي مش عارفة إن على مر التاريخ كل الملكات كانوا كدا قبل ما يتستتوا؟ اقري التاريخ يا بنتي الله يرضى عليكي.
وبعدين هو عشان لقيتي واحد زميلك في الجامعة كاتب «أنا من جيل ابن وسخة» تعملي زيه؟ هو كاتب كدا علشان دا رأيه، ومن حق كل واحد يعبر عن رأيه بحرية، لكن انتي تكتبي دا ليه؟ رأيك كدا برضه؟! ماشي، مش هانحجر على رأيك، بس ما ينفعش تكتبيه كدا علناً. أيوه إحنا قلنا من حق كل واحد يعبر عن رأيه، بس انتي مش واحد... انتي واحدة، والبنت الرقيقة ما تقولش كلام زي دا أبداً. حتى لو سمعتيها في مسلسلات التليفزيون، برضه دا مش مبرر، ولا كون أخوكي وأبوكي بيقولوها على طول برضه مبرر. انتي بنت. فاهمة يعني إيه بنت؟ يعني سمعة. دلوقت لو سمعتك باظت مش هايجيلك عرسان وحتبوري. حرام عليكي يا بنتي عاوزين نفرح بيكي.
إيه دااا؟!!! إيه اللي انتي كاتباه دااا؟!!! «أوف أح السيسي حطه صح»؟ انتي اتجننتي يا بت. يخرب بيت اليوم اللي سبناكي فيه تنزلي من البيت أصلاً. تعرفي الأوف والأح منين يا بت؟ انطقي! *قلم نازل يرف على وشها* مين يا بت اللي علمك الأوف والأح؟ ومين اللي قال لك إن السيسي حطه؟ يا بنت الكلب السيسي لسه بيحطه وما دخلش كله. يعني اتعلمتي الأوف والأح و لسه مش عارفة السيسي حطه كله ولا لأ؟ انطقي يا بت عرفتي الكلام دا منين. أفلام سكس؟! يا لهوي؟! بتتفرجي على أفلام سكس يا بنت الكلب؟! *قلم تاني نازل يرف على وشها* وانتي مالك أخوكي بيتفرج على الأفلام دي ولا لأ. دا ولد... يعمل اللي هو عاوزه. وعرفتي منين أصلاً إنه بيشوف أفلام سكس؟ انتي بتتجسسي على أخوكي يا بت؟ إيه؟! وليه تلاقي سي دي ع المكتب فتفتحيه تشوفي فيه إيه؟ انتي مالك فيه إيه؟ بتقولي إيه؟ طب ما يحط مواقع السكس على الفيڤوريت في الكمبيوتر، انتي مالك بها؟ تدخلي على المواقع دي ليه؟ دخلتي على موقع لقيتي فيه قلة الأدب دي تخرجي منه على طول. يعني إيه ما كلمناكيش عن الجنس؟! لا هو انتي عاوزانا نتكلم معاكي عن حاجات زي كدا؟ انتي شكلك اتهبلتي خلاص وشلتي برقع الحيا. البنت المحترمة ما تتكلمش في المواضيع دي غير بعد ما تتجوز، ويستحسن ما تتكلمش فيها خالص أصلاً. يلعن أبو الإنترنت ع اللي عمله. وريني حاطة إيه تاني ع التايملاين يا فاجرة!
إيه يا بت صور البوس اللي انتي حاطاها دي؟ جبتي لنا العار يا بنت الكلب! يعني إيه البوس حاجة عادية؟! عادية إزاي؟ أيوه إحنا بنبوس بعض علشان متجوزين، بس مش كدا برضه. عمرك شفتينا بنبوس بعض أساساً؟ طب ولما انتي ما شفتيناش بنبوس بعض إزاي بتقولي البوس دا حاجة عادية؟! يا ريت مبارك كان فضل قاطع الإنترنت عن البلد بدل البهدلة اللي احنا فيها دي. أصلاً حرام حد يبوس مراته في النور. لازم الدنيا تبقى ضلمة كحل. تقومي انتي تحطي صور ناس بتبوس بعضها في النور وقصاد الكاميرا كدا؟ وبعدين إيش عرفنا إن دول متجوزين؟ مش يمكن أستغفر الله العظيم مش متجوزين؟ يبقى إحنا كدا ساكتين عن الفاحشة اللي بتحصل قدام عينينا دي؟ مالكيش دعوة بأخوكي *صراخ هستيري* أخوكي ولد قلنا... ولد... ولد... انتي بتفهمي إزاي؟ الناس حتاكل وشنا بسببك الله يحرقك.
وكمان صور كارتون فيها إيحاءات جنسية؟! مش ناقص بقى غير إنك تتفرجي على باسم يوسف عشان تبقى الفضيحة بجلاجل! اخرسي *صراخ هستيري تاني* إيه يعني عندك ٢٥ سنة؟! إنشالله يكون عندك ١٠٠ سنة حتى، هو علشان كبرتي تعملي اللي على مزاجك؟ دا إحنا نموتك ونشرب من دمك قبل ما تفضحينا قدام الناس. مين يا بت اللي شاف الحاجات اللي حاطاها على التايملاين بتاعك دي؟ يا لهوي!! *شهقة ملتاعة* يعني إيه كل الناس؟! يعني أي حد ممكن يشوف الحاجات دي ويعرف إنك انتي اللي كاتباها؟ يعني مدحت ابن أونكل مراد شافها؟ طبعاً إزاي يا بت يا فاجرة؟! دا مدحت دا اللي كنا حاطين عيننا عليه ييجي يتقدم لك وأبوه متفق مع أبوكي على كدا من زمان. يعني إيه زمايل وبس يا بت؟! انتي عاوزة تصغري أبوكي قدام الناس يا بنت الكلب يا عديمة الرباية؟! بتـ... إيه؟! قوليها تاني كدا! بتحبي يعني إيه يا فاجرة؟! إحنا عندنا بنات تحب وقلة الأدب دي؟! آدي آخرة إننا سبناكي تدخلي الجامعة. كنا فاكرينك عاقلة طلعتي عاوزة الحرق بجاز وسخ. قسماً عظماً ما انتي مخطية عتبة البيت تاني. بلا شغل بلا خرا... الواحدة مالهاش إلا جوزها وبيتها وعيالها. ما لكيش دعوة بأخوكيييي! *صراخ هستيري فشخ* يصاحب ولا يحب ولا يتنيل... هو ولد... هانقولها كام مرة دي؟!
إدينا لها حقها وساويناها بأخوها من صغرها وآدي النتيجة: عاوزة تبقى زيها زي أخوها. إحنا الغلطانين إننا ما قعدناهاش في البيت بعد الثانوية. يعني هي حتعمل إيه بشهادة الجامعة؟ ما هي في الآخر حتقعد في البيت تربي العيال. إحنا نشيل الكمبيوتر دا خالص و نجيب لأخوها لابتوب يحط عليه كلمة سر عشان الفاجرة دي ما تستخدموش من وراه. استر على ولايانا يا رب!
ملحوظة: كل الصور السابقة من حسابات حقيقية لبنات على تويتر.
ملحوظة تانية: لو انت شايف إنك عادي إنك تشتم أونلاين، يبقى لازم تشوف إنه عادي برضه البنت تشتم أونلاين وإلا تبقى ابن متناكة بوشين. أنا بأحترم البنت اللي بتشتم عيني عينك أكتر من اللي عاملة نفسها مؤدبة وبتشتم في الدرا وتعمل كل اللي نفسها فيه برضه في الدرا.
ملحوظة تالتة: لو انت شايف إن الشتيمة أونلاين عيب ما تشتمش. انت حر. بس مش شغلة كس أمك إنك تربي خلق الله. انت مش البوليس الأخلاقي للإنترنت يا روح أمك.
ملحوظة رابعة: في عصر الإنترنت، تبقى أهبل ابن ستين هبلة لو تخيلت إن البنت ما تعرفش حاجة عن الجنس وإنك انت الواد البريفكس اللي مقطع السمكة وديلها. البنت أصلاً من حقها تتعلم عن الجنس زيك بالظبط لأنك مش حتمارس الجنس مع نفسك يا كس أمك. والبنت عندها مشاعر ورغبات زيك بالظبط، ومش معنى كدا إنها شرموطة، وإلا تبقى انت كمان شرموط عشان عندك رغبات جنسية.
ملحوظة خامسة: البنت اللي بتشتم مش بالضرورة أبداً شرموطة، ولا البنت اللي بتتكلم عن الجنس، انت اللي ابن ميتين كلب متربي على ثقافة بنت متناكة مخلياك مقتنع بكدا. البنات انتقائيين جداً في علاقاتهم الجنسية، حتى في المجتمعات اللي فيها حرية جنسية كاملة. يعني مش رغبتها الجنسية هي اللي ممشياها زي ما انت ماشي ورا بتاعك زي الأهطل.
ملحوظة أخيرة: لو مش عاجبك الكلام دا سيبه وامشي و لا كأنك قريته، وما تحاولش ”تربيني“ وتعلمني الأدب علشان حأطلع كس أمين أمك لو حاولت. أنا عايش بمبدأ “Live and let live” وطالما ما حدش ضرني بأي شكل أنا ما ليش دعوة بقراراتهم وتصرفاتهم الشخصية.
ليست هناك تعليقات:
إرسال تعليق