هذا العمل لا يمت بأي صلة لأي شخصيات واقعية، وأي تشابه بينه وبين أي وقائع هو من محض الصدفة البحتة. أنا كنت نايم ومعرَيها فجالي كابوس وقررت أنشره علشان ينشف. آه...!! أنا عندي عيال عايز أربيهم.
أحّا أحّا... لا تتنحّى!!
لا يجيلنا زغُطّة معاها كُحّة
دا أنت الريّس وأنت الحاكم
وأنت الآمر ناهي شاخط ناطر قاعد قايم نايم
وأنت الحاسس نبض الشارع
وأنت الشاري وأنت البايع
وأنت حكيم وطبيب وفلاسفة
وإحنا قُلَل مرمِيّة في قُفّة
وأنت الحامي من الأشرار
والحاكم بحديد وبنار
وأنت شايلنا في نِنّي عيونك
وأنت حابسنا في بطن سجونك
وإحنا الشعب العرة الجاحد
فالحين نتكلم ونعاند
عايزين قال حد يعبرنا!!
قبل ما يدي الأرض لجارنا
أصلنا شعب ناقصنا رباية
وولاد كلب بنطمع في الحاجة اللي عشانها مات أهالينا
وعشان ماتوا ما علموناش
إن الأرض تروح ببلاش
يادي النيلة!! مش ببلاش!!
آسف... أصل أنا واد حشّاش
خدنا فلوس تنعش أحوالنا
وتنضفنا وتمَنْجِهنا ومانبقاش حبة أوباش
وتعالجنا وتعلمنا وتأكلنا وتشربنا
بس عشان القَرّ القَرّ وأهل الشر
نشتري بالأموال دي سلاح
أصل الدولة أساسها سلاحها
وأحّا أحّا... لا تتنحّى!!
أنا بأتكلم من غير إذن
بس أنا عذري معايا يا بِيه
أنا بأتكلم علشان أمدح فيك وأمجّد فيك وأزِنّ
دا أنت البركة وأنت الحركة
وأنت الجامد والسوكسِيه
وإحنا ولاد الإيه زاعجينك
طلعنا عينيك من زرابينك
ناس غاويين تلاكيك ومعاندة
لكن وغلاوة الست الوالدة
استحملنا كمان سنتين
أو ستاشر أو عشرين أو قرنين
مش قصدي القرنين ع الراس
دا أنا أعمل لك خدي مداس
دا أنت لوحدك بس في حُكمك
حِبْلِت فجأة نسائنا بنجمك
آه والنعمة كدا زَمْبَؤلّك
يا حافر لنا قنوات ع الناشف
ومغرقنا هَنَا وحرية
يا محارب إرهاب ’أبو نايف‘
اللي بقى يخاف م الطعمية
وحتى لو الطعمية صَبَحِت غالية وشاحّة
أحّا أحّا... لا تتنحّى!!
قال لك عايز أختي تِيران!
حد يسَمّي أخته تِيران؟!!
طب سَمّيها بقر ومعيز... دا اسم لذيذ
اسمها كُخّة مالوهش رنين
لا وصاحباتها كمان خشنين
قال صنافير!!
بدل الصنفرة ليه ما يكونش الاسم ”حرير“؟!
ياللا في داهية بلاش أسماء فجل وجرجير!
مش في مقامنا الأسماء دي... دا مقامنا كبير
طب وعيون الريّس دي معقولة تخون؟!
أما صحيح إنك متخلف أو مجنون!!
دا اللي يقَرّب منها نشيله من على وِشّ الأرض
وإحنا وراك يا زعيمنا بالطول أو بالعرض
واثقين إنك بِعْت عشان الأزمة تمر
واثقين إنك مش حتفَرّط حتى في شِبْر
واثقين في غبائنا وفي ذكاءك
عارفين سفالتنا وواثقين في كرم أخلاقك
قلت ”نشيله من على وِشّ الأرض“ أكيد
شلناه على راسنا ولو حَكَمِت تؤمرنا نبقى له عبيد
قول واؤمرنا وإحنا ننفذ زي القرد
لو عايز ندي له الحتة اللي في ريحها وفي ريح ريحها
أحّا أحّا... لا تتنحّى!!
أنا عارفك عايز مصلحتي
واحد غيرك كان رمى طوبتي وسابني براحتي
لكن الريس قلبه حنون
وفاتح لينا بلدنا سجون
ومسَلّينا... وبيِخفينا... ولا سحر يا ناس ولا شعوذة
مش عارفين نطلع بزيارة ع المعتقل
ولا نقف في صوان العزا
عايشين حالة من الساسبنس
أحلى من التفخيد والجنس
يا مهنينا... وفاشخ فينا جن وإنس
افشخ أكتر... عايز أتوب
اقبل توبتي، ولا ترميش من إيدك طوبتي
اضرب... كهرب... عذّب... دوس
ماهو طال عمره إدانا فلوس
نبني سجون ونجيب خرطوش
يا حلاوتك وأنت بتتكلم وإحنا علوج
قاعدين نسمع لك ونصقف للمونولوج
ماشيين بالسنتي وبالمللي على الكتالوج
أصل بلدنا في حالة حرب
وإحنا يا ناس نستاهل الضرب
عايزين إيه غير أكل وشرب؟!
حتى الأكل دا كماليات
يوم ما تقول لنا جوع حنجوع
أنت كوماندا وإحنا بتوع
زي ما تؤمر نمشي وراك وبكل خضوع
حتى الميه ماهيش عايزينها
نشرب بيبس
وإحنا في حالة من الساسبنس
نشرب بيبس وناكل جبس
ونعيش عيشة جنس في جنس
دا أنت زعيم والنعمة برنس
وإحنا نخَلّي في عيننا قناعة وحصوة ملحة
أحّا أحّا... لا تتنحّى!!
شعب ماهوش حيجيبها البرّ
مش خايف من أهل الشر
بس خلاص من يوم ما سمعنا إننا لو ينفع كنا نبيعك
من يومها قررنا نطيعك
هات يا محَمّا قرش حشيش والولعة ورُصّ
واسمع بَس كلامه وبَس
لو يتكلم كُلّه سُكْتُم بُكْتُم هُسّ
كلمة نقولها في ست دقايق هو يقولها في ساعة ونص
علشان هو الريّس هو المجدع سِيد الكل البوصّ
وأنت بروح أهلك يا محَمّا حتفهم أحسن م الكُبارات؟!
دي مخابرات!!
شغل تلات ورقات!! عصابات!!
وماينفعش نقول أسرارها ع الإذاعات
قومي يا بِه بِلّي الشربات
مصر حتبقى قد الدنيا
مصر حتبقى خلاص حاجة تانية
والمصري في دقيقة... في ثانية...
حيبقى حديث المانشيتات
برلين وباريس... جدة وروما...
”قتلوه كالفيل أبو زلومة“
وإحنا زعيمنا ماسك الشومة
لكل الوحشين والوحشات
واد يا محَمّا غَنّي وقول ”جرحوني وقفلوا الأجزخانات“
وأنت بتشرب الشربات
بس تغَنّي من غير حِسّ
هُس!! تبُص وتسمع بَس!
وأُوعاك ما يبانش عليك فرحة
مهما يكون تهتف وتقول ”أحّا أحّا لا تتنحّى“
تسجيل صوتي للكابوس
ليست هناك تعليقات:
إرسال تعليق