عجيب هذا الفوتوشوب...! في عقدين من الزمان أو ما يقرب تحول الفوتوشوب إلى تقنية فظيعة يمكن بواسطتها خلق عالم غريب و مريب يشابه الواقع بدرجة كبيرة حتى تظن أنه فعلاً يحدث...! و حياة العيش و الملح و الفول و الطعمية بيحصل و هاقدم لك الدليل.
ممكن الفوتوشوب يقنعك إن حمو النيل ده اصابات خرطوش:
أو إن اللي في إيد الجدع ده اصابات خرطوش برضه و مش تعاوير من الهرش في جلده بسبب الجرب:
أو إن اللي خرم الصفيح ده خرطوش برضه مش صدأ و لا عيال من اللي بتمشي في الشارع بمسامير تجرح في العربيات:
أو إن اللي في وش سلمى ده (البنت دي اسمها سلمى) اصابات خرطوش برضه مش حب الشباب:
أو إن بمب العيد اللي الشرطة بتحتفل بيه ده قال إيه.... خرطوش...!!
أو إن البونبوني اللي الشرطة بتوزعه على الجمهور من البنادق ده و هما راكبين المدرعات في إحتفالات الثورة قال إيه.... خرطوش!!
أو إن الشباب اللي شايل أسلحة دمار شامل ده و بيضرب بيها جنود الشرطة العزل شايل قال إيه يا خويا علم و الشرطة شايلة بنادق...! تصدق إنت دي؟!
أو إن لا مؤاخذة اللبوس اللي ماسكه أبو حامد ده و رافعه في وش السيد الفاضل رئيس المجلس الموقر قال إيه.... عرفت إنت بقى... خرطوش...!!!
أو إن البرادعي العميل الخائن الجاسوس استقبله فضيلة جناب الدكتور الكتاتني قبل كده:
و شوف الفجر بقى...! ممكن يقنعك إن فضيلة جناب الدكتور الكتاتني سلم على هذا الداعر الفاسق عميل الأمريكان:
و الأدهى من كده إنه ممكن يقنعك إن البرادعي مش بس قعد مع الإخوان و نسق معاهم وقت الثورة، لكنه قعد مع تقريباً كل التيارات الثورية بمختلف اتجاهاتها...! شفت الكدب و التدليس...!
أو يحاول يخليك تصدق إن البرادعي اللي عاوز يقلع أمك الحجاب هو نفسه أمه لابسة حجاب...!
أو إن البرادعي الكافر الملحد الزنديق يبقى مسلم...! تصدق إن الفوتوشوب ممكن يعمل كده؟!
أو ممكن يعملوا لك صورة تخلي البرادعي الثائر على تويتر اللي عمره ما عتب الشارع و لا شاف مظاهرة... تخليه إترش بالمية في مظاهرة زي باقي الناس... شفت التكنولوجيا بتعمل إيه...؟!
أو تخليك تصدق إن العيال البلطجية اللي بيضربوا ترمادول اللي قال عليهم جناب الشيخ الفاضل الورع قال إيه....!!!! بيصلوا في الشارع....!!!
أو إن فيه ناس فعلاً ماتوا عند ماسبيرو و مدرعات الجيش دهست عليهم. تصدق انهم ممكن يخلوا وش الجدع اللي على الشمال من تحت ده في الصورة مبطط زي ما تكون المدرعة فعلاً داست عليه. حتى الصورة شكلها طبيعي جداً زي ما يكون الناس دول ماتوا بجد...!
يا راجل ده من كتر الفجر بتاع التكنولوجيا الفظيعة دي قدروا يقنعونا إن عندنا فعلاً مجلس شعب...!
يا راجل دول وصلت بيهم البجاحة لأنهم يعملوا صور تفهمك إن القائد الثوري السيد المشير طنطاوي أعز الله شأنه كان حبيب مبارك، و بالتالي يوحي لك إنه مش بيحب الشعب و لا بيحب الثورة...! شفت بقى ممكن الحب يتزور ازاي في زمن الفوتوشوب؟!
ليست هناك تعليقات:
إرسال تعليق